Çinin Azərbaycandakı səfirliyinin müvəqqəti işlər vəkili Dinq Tao “Azərbaycan-Çin münasibətlərinin yenidən qiymətləndirilməsi: İrəliyə doğru yol” mövzusunda keçirilən tədbirdə iki ölkə arasındakı münasibətlərin inkişafından danışıb. O qeyd edib ki, “Bir kəmər, bir yol” təşəbbüsünün həyata keçirilməsi və Transxəzər marşrutu ilə birləşdirilməsi istiqamətində ciddi işlər görülür.  Səfirlik rəsmisinin sözlərinə görə Çin və Azərbaycan ikitərəfli münasibətləri yüksək səviyyəyə qaldırmaq üçün tarixi fürsət əldə ediblər: “İki ölkə arasında alternativ enerji mənbələri istiqamətində əməkdaşlıq mövcuddur.  2023-cü ildə iki ölkə arasında ticarət dövriyyəsi rekord həddə çatıb. Çin Azərbaycanın beynəlxalq nüfuzunu alqışlayır və COP29 çərçivəsində Azərbaycanı dəstəkləyir. Azərbaycan Çində 5 ticarət evi açıb. 2023-cü ildə iki ölkə arasında ticarət dövriyyəsi rekord həddə çataraq 3,1 milyard dollar təşkil edib. Bu da 43 faiz artım deməkdir”, – o əlavə edib. 

Azərbaycan-Çin münasibətlərinin inkişafını yüksək qiymətləndirən Milli Məclisin deputatı Elman Nəsirov Demokrat.az-a açıqlamasında deyib ki, Çin müasir dünyanın əsas güc mərkəzlərindən birinə çevrilib.

Onun sözlərinə görə, Azərbaycanla Çin fundamental məsələlərdə ortaq mövqeyə malikdir:

“Çin üçün ən vacib məsələ “Vahid Çin” ideyasının reallaşdırılmasıdır. Azərbaycan dövləti də Çinin ərazi bütövlüyünü tanıyır və bu ideyanı dəstəkləyir. Torpaqlarımız işğal altında olarkən Çin hər zaman beynəlxalq müstəvidə Azərbaycanın mövqeyini müdafiə edib. İqtisadiyyat, kənd təsərrüfatı, turizm də bizi yaxınlaşdıran sahələrdir. Çin Azərbaycanın kənd təsərrüfatı məhsullarının idxalında maraqlıdır”.
E.Nəsirov bildirib ki, “Bir kəmər, bir yol” konsepsiyası əsasında münasibətləri inkişaf etdirməkdə hər iki ölkə maraqlıdır:

“Hər iki dövlət bir-birinin qarşılıqlı maraq dairəsində olan dövlətlərdir. Hər ikisi də beynəlxalq hüququn norma və prinsiplərinə hörmətlə yanaşır. Azərbaycanla Çin arasında münasibətlərin əsasını ulu öndər Heydər Əliyev qoyub. Bu gün cənab Prezidentin yeritdiyi siyasət bunun davamıdır. Təsadüfi deyil ki, Çin lideri Si Cinpin Prezident İlham Əliyevi “Çinin böyük dostu” adlandırmışdı. Azərbaycan elə də böyük dövlət deyil, amma onun sözünün dünyada məna və çəkisi böyükdür. Bu da ölkə başçısının misilsiz fəaliyyətinin nəticəsidir”.

Aprel ayının 19-da Azərbaycan-Ermənistan sərhədlərinin delimitasiya üzrə dövlət komissiyalarının 8-ci iclasında tarixi qərar qəbul edilib. Bir güllə belə atılmadan Ermənistan tərəfi 1990-cı illərin əvvəllərindən işğal altında saxladığı Qazax rayonunun 4 anklav olmayan kəndlərinin Azərbaycana qaytarılmasına razılıq verib. Sözün həqiqi mənasında bu, mühüm hadisədir. Nəzərə alsaq ki, 2020-cü ildə 44 günlük Vətən müharibəsində Müzəffər Ali Baş Komandan İlham Əliyevin rəhbərliyi altında şanlı Ordumuzun və dəmir yumruğa çevrilmiş xalqımızın qazandığı tarixi Zəfər ərazi bütövlüyümüzü təmin etdi. Bundan sonra 2023-cü ilin sentyabr ayında bir sutkalıq lokal antiterror əməliyyatları nəticəsində Qarabağda separatizmin kökü kəsildi. Erməni separatçıları ağ bayraq qaldırdılar. Özlərinin qondarma qurumunu buraxmış elan etdilər və eyni zamanda Qarabağda yaşayan ermənilər könüllü şəkildə bu əraziləri tərk etdilər. Həmin vaxtdan etibarən Azərbaycanın suverenliyi də tam və qəti şəkildə təmin edilmiş oldu. Bunun ardınca yenə də Prezident İlham Əliyevin müdrik siyasəti və mahir diplomat olaraq atdığı addımlar sayəsində Rusiya sülhməramlı qüvvələri vaxtından erkən Qarabağ iqtisadi rayonundan çıxarılmağa başlanılıb. Bütün bunların hər biri tarixi hadisələrdir, Azərbaycan tarixinə qızıl hərflərlə yazıla biləcək proseslərdir. İndi də Ermənistan tərəfi bütün bu reallıqlar fonunda Azərbaycan torpaqlarının işğal altındakı 8 kənddən 4-nün geri qaytarılmasına razılıq verib.

Bu sözləri “İki sahil”ə açıqlamasında Milli Məclisin deputat Elman Nəsirov bildirdi.

Qətiyyətli və prinsipial mövqe

Deputat bildirdi ki, bu, həm də beynəlxalq aləmdəki anti-Azərbaycan dairələrin siyasətinin iflasa uğraması kimi dəyərləndirilə bilər. Eyni zamanda, öz içərimizdən, o sapı özümüzdən olan baltaların, milli dönüklərin indiyədək verdiyi bütün proqnozları alt-üst edib. Xüsusilə Fransanın timsalında biz onu görürdük ki, Ermənistanı silahlandırılır. Ermənistan Azərbayacana qarşı revanşizmə çağırılır. Ermənistan siyasi lideri ilə 5 aprel Brüssel görüşündə ona vədlər vermişdilər, həmçinin hərbi dəstək vəd etmişdilər. Amma Ermənistanın baş naziri fərqindədir ki, Azərbaycan son dərəcə güclüdür. Azərbaycan dövləti ilə hərbi rəqabətə girmək siyasi dəlilikdir. Ona görə də vəziyyəti düzgün qiymətləndirərək bu addımı atıblar. Hesab edirik Qazaxın işğal altında olan digər 3 kəndinin və Naxçıvanın Kərki kəndinin də geri qaytarılması zaman məsələsidir. Çox yaxın zamanda biz buna da şahidlik edəcəyik. Çünki başqa cür ola bilməz. Azərbaycanın heç kimin torpaqlarında gözü yoxdur, biz öz torpaqlarımızı geri istəmişik. Hesab edirəm ki, indiki halda Ermənistan siyasi rəhbərliyi düzgün qərar qəbul edib. Çünki fərqindədir ki, Azərbaycan bir qarış torpağının belə işğal altında qalmasına imkan verməz. Necə ki, Prezident İlham Əliyev bu reallığı öz qətiyyətli və prinsipial addımları ilə təsdiqləyib, bütün dünya bundan xəbərdardır. Xəbərdarlıq etmişdi ki, könüllü şəkildə xoşluqla bizim işğal altındakı kəndlərimizi geri qaytarın. Geri qaytarmasanız onda bunun bütün məsuliyyəti sizin və eyni zamanda sizə havadarlıq edənlərin üzərinə düşəcək. Nəticə göz qabağındadır.

Azərbaycan xalqı Müzəffər Prezidenti ilə fəxr edir

Bu, bir daha onu göstərdi ki, Azərbaycan xalqı Prezident İlham Əliyevə bu ilin fevral ayında keçirilən növbədənkənar prezident seçkilərində təsadüfən səs verməmişdi. Bu, həm də Prezident İlham Əliyevin misilsiz fəaliyyətinə xalqın bir etimad referendumu idi. Cənab İlham Əliyev 92,12 faiz xalqın səsini toplayıb növbəti dəfə Prezident seçildi. Xalqımızın nə qədər müdrik və uzaqgörən olduğunu bu hadisələr, bu faktlar, həm də 4 kəndin bir güllə atılmadan belə Azərbaycana geri qaytarılması təsdiqlədi. Bu gün doğrudan da Azərbaycan xalqı öz Müzəffər Prezidenti ilə fəxr edir, qürur hissi keçirir. Xalqmız onun fərqindədir ki, sözügedən tarixi addımların bir müəllifi var, o da  tarixi şəxsiyyət olan Prezident İlham Əliyevdir, Onun formalaşdırdığı ordudur, dövlət başçımızı dəstəkləyən Azərbaycan xqlqıdır.

“Bu gün dünyada çox ciddi xaotik proseslər yaşanmaqdadır. Dünyanın əksər ölkəsində siyasi-hərbi toqquşmalar, kataklizmlər müşahidə olunur. Beynəlxalq hüquq, demək olar ki, işləmir. Bu gün sabit bir bölgə, sabit ölkə axtarıb tapmaq müşkül məsələyə çevrilib. Bu reallıq fonunda Azərbaycanın həm Şimal, həm də Cənub qonşuluğunda çox ciddi hərbi-siyasi proseslər gedir. Şimal qonşumuz Ukrayna ilə şiddətli müharibə vəziyyətindədir və müharibə getdikcə daha da kəskinləşir, daha böyük fəlakətlər müşahidə olunur. Ölkənin cənubunda İrandır, İran isə İsraillə müharibə vəziyyətindədir. Bu müharibənin nə qədər davam edəcəyini, hansı fəlakətlərə gətirib çıxaracağını proqnozlaşdırmaq çətindir. Düzdür, hələlik strateji pauzadır. “Bu pauza nə qədər çəkəcək?”, “İsrailin cavab zərbələri nə vaxt olacaq? kimi suallar hazırda ən çox düşündürən suallardır. Bu reallıqlar fonunda Azərbaycan sabit dövlətdir. Azərbaycanda ictimai-siyasi sabitlik, vətəndaş həmrəyliyi hökm sürür, səfərbər olunmuş cəmiyyət var. Ancaq anti-Azərbaycan dairələr bu reallıqla barışmaq istəmirlər. Bu reallıq xaricdəki anti-Azərbaycan dairələrin yuxusuna haram qatır. Onlar çalışırlar ki, Azərbaycanı da toqquşma ocağına çevirsinlər. İçimizdəki sapı özümüzdən olan baltalardan – milli dönüklərdən də məmnuniyyətlə istifadə edirlər. Eyni məntiqlə söyləmək olar ki, uzun müddətdir, fəaliyyətsiz dayanan Azərbaycan Xalq Cəbhəsi Partiyası və Milli Şura indi oyanıb öz xaricdəki “sahiblərinin”, “yiyələrinin” sifarişi əsasında Azərbaycanda gərginlik yaratmaq istəyir…” 

Bu sözləri Pravda.az-a açıqlamasında Milli Məclisin deputatı Elman Nəsirov deyib. 

Deputat bildirib ki, AXCP və Milli Şuranın aprelin 21-nə təyin etdikləri mitinqlə bağlı seçilən ərazilər şəhərin mərkəzidir: “O yerlər ki, orada insanlar kompakt halında, sıx cəmlənirlər. Belə bir mitinqin keçirilməsi ilk növbədə insanların təhlükəsizliyi və asayişin qorunmasında ciddi problemlər yarada bilir. Eyni zamanda insanların istirahət hüququnun pozulması anlamına gəlir. Çalışırlar ki, ətrafdakı gərginlik ocaqlarını ölkəmizə də transfer etsinlər, burada da hərc-mərclik yaratsınlar. Necə ki özləri 1992-1993-cü illərdə xaos dövründə yaşadılar, xaosun müəllifləri oldular. İndi həmin dövrü yenidən qaytarmaq istəyirlər. Xülyalarla, illuziyalarla yaşayırlar. Çalışırlar ki, elə məsələləri qaldırsınlar, həm də rezonansı olsun. “Siyasi məhbusların” azadlığa buraxılması şüarı ilə çıxış edirlər. Azərbaycanda “siyasi məhbus” yoxdur, ola da bilməz! Azərbaycanda konkret cinayət əməlinə görə həbs edilmiş, saxlanılmış şəxslər var. Buna görə də Azərbaycan üçün “siyasi məhbus” ifadəsi qəbuledilməzdir. Ünvanı səhv salıblar. Bu, siyasi manipulyasiyadır. Ölkəmizə qarşı təzyiq elementlərindən biri kimi qiymətələndirilə bilər. Sərhədlərin açılmasından danışırlar. Sərhədlərin bağlı olması ilk növbədə təhlükəsizlik məsələləri ilə əlaqədardır. İndi həm Şimal, həm də Cənub qonşumuzda yaşanan proseslər göstərir ki, Azərbaycanın quru sərhədləri bağlı saxlaması olduqca doğru qərardır. Heç bir dövlət istəməz ki, sərhədəri bağlı qalsın. Çünki bağlı sərhədlər müəyyən iqtisadi, sosial problemlər yaradır. Amma Azərbaycan üçün əsas məsələ öz vətəndaşının təhlükəsizliyidir. İstəyirlər ki, bu faktın mahiyyətini dəyişib özlərini “göyərçin” kimi cəmiyyətə sırısınlar. Xalq onları yaxşı tanıyır, kimliyini çox gözəl bilir. Vətən müharibəsindəki davranışlarını xalqımız yaddan çıxarmayıb. O zaman da Azərbaycan əleyhinə mübarizə aparan beynəlxalq siyasi dairələrə ünvanlanan müraciətlərdə  onlar iştirak etmədilər, kənarda qaldılar. Çünki “Azərbaycan xalqı üçün nə pisdirsə, onlar üçün yaxşıdır və nə yaxşıdırsa, onlar üçün pisdir” fəlsəfəsi işləyir. Xalqımız da bütün bunları görür, bu səbəbdən də onlara etimadı yoxdur. Xalqımız bu qruplaşmaları çoxdan boykot edib. Onlar siyasi yalquzaq həyatı yaşayırlar. Çalışırlar ki, bulanıq suda balıq tutsunlar, regionumuzdakı gərginlikdən istifadə edib Azərbaycan daxilində çaxnaşma yaratsınlar. Bu illuziyadır, reallaşma əmsalı isə sıfıra bərabərdir. Azərbaycan güclü dövlətdir, onun güclü Lideri, “Dəmir Yumruq”  kimi birləşmiş xalqı var. Xalq öz Prezidenti ətrafında monolit birlik nümayiş etdirir. Bu reallıqlar fonunda Milli Şura və AXCP-nin arzuları heç vaxt real həyatda gerçəkləşə bilməz”. 

“Bu gün Yaxın Şərq regionunda vəziyyət drammatikləşir. İranla İsrail arasında müharibənin qaçılmaz olduğu haqqında mövqe daha da güclənib. Bunu şərtləndirən amillər var. Artıq Almaniya öz vətəndaşlarına xəbərdarlıq edib ki, İrandan çıxsınlar. Eyni zamanda Almaniyadan İrana uçuşlar da dayandırılıb. İranın siyasi-hərbi rəhbərliyi birmənalı şəkildə söyləyir ki, İsraili cəzalandıracaq. İranla birbaşa əlaqədə olan Hizbullah tərəfindən də İsrail istiqamətində təzyiqlərin artdığı bəllidir. Bu, müharibənin ilkin işartıları kimi qiymətləndirilə bilər. Paralel olaraq ABŞ Prezidenti Cozef Bayden də bildirdi ki, İsraillə İran arasında müharibə başlayacağı təqdirdə rəsmi Vaşinqton İsrailin yanında olacaq, onu dəstəkləyəcək və bu, İran üçün çox səhv addım olar, heç bir halda uğur qazanmayacaq. Göründüyü kimi, hadisələrin inkişafı göstərir ki, istənilən vaxt müharibə başalaya bilər. Artıq gün, saat məsələsidir, bu kimi yanaşmalar çoxdur”. 

Bu sözləri Pravda.az-a açıqlamasında Milli Məclisin deputatı Elman Nəsirov deyib. 

Deputat bildirib ki, İran və İsrail arasında müharibənin başlanması regionda geosiyasi vəziyyəti kökündən dəyişə bilər: “Nəzərə alsaq ki, İran Azərbaycanla qonşu dövlətdir. Məşhur deyim var, “qonşuda ev yanırsa, külək o yanğını başqa evlərə də yaya bilər”. Bu baxımdan, qonşuda “evin yanması” təhlükəli hadisədir. İranda 40 milyondan artıq azərbaycanlı soydaşımız yaşayır. Müharibə başlayacağı təqdirdə böyük qaçqın ordusu əmələ gələ bilər. Bunları da hesablamaq mümkündür. Buna görə də Azərbaycan dövləti son dərəcə maraqlıdır ki, İranla İsrail arasındakı indiki gərginlik danışıqlar, sülh yolu ilə tənzimlənsin. Düşünürəm, tərəflərdən müraciət olarsa, Azərbaycanın danışıqlarda vasitəçilik missiyası çox səmərəli ola bilər. Çünki yadınızdadırsa, Türkiyə və Rusiya arasında vəziyyət kəskinləşəndə Azərbaycan Prezidenti cənab İlham Əliyevin vasitəçilik missiyası olduqca faydalı oldu. Azərbaycanın İranla da yaxın qonşuluq münasibətlərini, eyni zamanda İrandakı 40 milyondan çox soydaşımızın olmasını faktlarına diqqəti cəlb etsək, Azərbaycanın İsraillə strateji tərəfdaşlıq münasibətlərini nəzərə alsaq, hesab edirəm, Azərbaycanın bu dəfə də vasitəçilik missiyası çox faydalı ola bilər. Təki tərəflər özləri maraqlı olsunlar”.