Əlbəttə ki, iqlim dəyişmələrinə aid olan məsələlərə gəldikdə, bizə maliyyə vəsaiti lazımdır. Bəli, maliyyə məsələsi öz növbəsində COP29-un əsas mövzusu olacaq. Lakin bizə həmrəylik və qarşılıqlı etimad lazımdır. Biz bir-birimizi günahlandırmalı deyilik ki, kim planetə daha çox zərbə vurub. Yaxud da qlobal istiləşməyə görə kimin daha çox məsuliyyət daşıması ilə bağlı mübahisə etməməliyik. Əgər biz bu davranışı davam etdirsək, onda bunun sonu faciə olacaq.

Bu fikri Azərbaycan Prezidenti İlham Əliyev mayın 1-də Bakıda işə başlayan “Sülh və qlobal təhlükəsizlik naminə dialoq” mövzusunda VI Ümumdünya Mədəniyyətlərarası Dialoq Forumunun açılış mərasimində çıxışında deyib.

Bu yaxınlarda tərəfdaşlarla iqlim dəyişikliyi ilə bağlı danışdığını bildirən dövlət başçısı qeyd edib ki, bu, qaçılmazdır:

“Çünki biz neft hasil edən ölkəyik və dedim ki, neft-qazımızın olması bizim günahımız deyil. Başqalarının da belə təbii sərvətləri var və əlbəttə ki, onların öz təbii sərvətlərindən ölkələrinin faydası üçün istifadə etmək imkanı var. Azərbaycana gəldikdə, bu imkan nəinki Azərbaycana aiddir, biz təbii qazımızı səkkiz ölkəyə çatdıraraq onların enerji təhlükəsizliyinə töhfə veririk. Əgər biz bu gün məhz yol təchizatlarına, enerji təchizatlarına baxsaq görərik ki, onlar çox müxtəlifdir. Ona görə bizim səylərimiz körpülərin salınmasına yönələcək”. 

Mövzu ilə bağlı “Sherg.az”a danışan Milli Məclisin deputatı Elman Nəsirov bildirib ki, VI Ümumdünya Mədəniyyətlərarası Dialoq Forumu İlham Əliyevin 2008-ci ildə  mədəniyyətlər və sivilizasiyalar arasında səmərəli və effektiv dialoqun qurulması məqsədilə irəli sürdüyü platformadır: 

“2011-ci ildə ölkəmizdə ilk dəfə Mədəniyyətlərarası Dialoq Forumu keçirildi. Artıq həmin forum Azərbaycanda altıncı dəfədir baş tutur. Forum çərçivəsində Cənap Prezident İlham Əliyev çox mühim məqamlarla çıxış etdi. İlham Əliyev ilqim dəyişikliklərini müzakirə etmək üçün birlik olmağı təklif etdi. Dünyadakı ölkələr biri-birlərini ittiham edərək planetə kimin daha  çox ziyan vurduğunu və qlobal istiləşməyə görə kimin məsuliyyət daşıdığı ilə bağlı mübahisələr edirlər. Amma biz bu məsələlərə belə yanaşsaq problemi həll edə bilməyəcəyik. Həmin problemlər qlobal olduğuna görə, həllinə də qlobal yanaşmaq lazımdır. Heç kim əlahiddə şəkildə problemlərin öhdəsindən gələ bilməz. Birlik və həmrəylik olan zaman hədəflərimizə çatırıq”.

Deputat qeyd edib ki, Azərbaycan iqlim dəyişikliyi ilə bağlı problemlərin həllinə ciddi töhvə vermək niyyətindədir:

“Azərbaycan bərpa olunan enerji mənbələrinin əsas ixracatçılarından birinə çevrilmək iddiasındadır. Bunun üçün bizim potensialımız mövcuddur. Azərbaycan bu gün külək və günəş enerjisindən istifadə edir. Azərbaycanın paytaxtı Bakıda iqlim dəyişikliklərilə bağlı mövzuların tənzimlənməsin üçün çoxsaylı təşəbbüslər olacaq. Eyni zamanda, belə bir tədbiri həyata  keçirən Azərbaycan ölkə səlahiyyətindəki digər məsələləri də gündəmə gətirməlidir. Azərbaycan sülh və təhlükəsizlik məsələlərini də müzakirə predmenti etmək niyyətindədir. COP29 tədbiri daxilində dünyanı narahat edən sülh və təhlükəsizlik məsələlərilə bağlı iştirakçı tərəflər konkret təşəbbüslərlə çıxış edə bilərlər. Ukrayna Prezidenti Volodimir Zelenski və Rusiya Prezindenti Vladimir Putin də həmin tədbirə dəvət alıb. Tədbir zamanı iki ölkə arasında həllini gözləyən problemlərin də müzakirə olunma ehtimalı var. İlham Əliyevin qeyd etdiyi kimi, COP29 tədbirinə qədər Azərbaycan-Ermənistan arasında sülhün imzalanması əsas hədəflərdən biridir. Əgər bu baş tutarsa, Ermənistan Baş naziri Nikol Paşinyanın da COP29-a qoşulması mümkündür”.

Müsavat Partiyasının mayın 4-də keçiriləcək qurultayında başqanlığa namizədlərdən biri İsa Qəmbər olacaq. Qeyd edək ki, bundan əvvəl İsa Qəmbər 2014-cü ilə qədər 22 il partiyaya sədrlik edib. Onun 10 illik fasilədən sonra yenidən partiyaya rəhbərlik edəcəyi gözlənilir.

Milli Məclisdə Yeni Azərbaycan Partiyasını təmsil edən Elman Nəsirov Modern.az-a açıqlamasında bildirib ki, İsa Qəmbərin yenidən Müsavat Partiyasına başqan seçiləcəyi qənaətinə gəlmək mümkündür.

O, İsa Qəmbərin əvvəlki rəhbərliyin “səhvlərindən” nəticə çıxaracağını güman etdiyini bildirib:

“İsa Qəmbərin gəlişi müxalifət partiyası Müsavat Partiyasında hansı dəyişikliklərə gətirib çıxara bilər?”, “Bu dəyişikliklər nə dərəcədə müsbət ola bilər?”  kimi suallar bu gün aktualdır. Əvvəla onu qeyd edim ki, Arif Hacılının başqan olduğu dövrdə Müsavat Partiyası konstruktiv müxalifət ola bilmədi. Radikal mövqe ortaya qoydu, ümummilli məsələlərdə Azərbaycanın mənafeyini müdafiə etmədi. İkinci Qarabağ müharibəsi, ondan sonrakı dövrlərdə ölkədəki, demək olar ki, bütün siyasi partiyalar vahid mövqedən çıxış edərək, Azərbaycan dövlətini, dövlətçiliyini, haqq işimizi dəstəklədiklərini beynəlxalq aləmdə birgə müraciətləri ilə təsdiqlədilər. Təəssüf ki, Müsavat Partiyası bu məsələlərdə iştirak etmədi. Əslində Müsavat Partiyası iqtidara yox, dövlətə və dövlətçiliyə qarşı müxalifətdə dayandı. Halbuki müxalifətçilik dövlət və dövlətçiliyə müxaliflik demək deyil. O, iqtidara müxalif olmalıdır. Ancaq Arif Hacılının Müsavat Partiyası ilk növbədə dövlətçiliyə qarşı müxalifətdə oldu. İqtidara qarşı yanaşmalarında, çıxışlarında qeyri-obyektiv oldular. Hesab edirəm ki, bütün reallıqların hamısını kifayət qədər təcrübəli siyasətçi olan İsa Qəmbər özü üçün təhlil edə bilər”.

YAP-çı deputat qeyd edib ki, İsa Qəmbər Azərbaycanın bu gün tarixinin çox möhtəşəm, şərəfli mərhələsində olduğunun fərqində olmalıdır.

“Bu mərhələdə iqtidara müxalifətdə olub, onun verdiyi qərarları, atdığı addımları tənqid etmək olar. Onunla razılaşmamaq da mümkündür. Lakin bunun qarşılığında konstruktiv təkliflər, tövsiyələr, proqramlar, alternativ variantlar irəli sürməlisən. Ən asan iş tənqid etməkdir. Yəni bununla kifaytələnmək olmaz. Güman edirik ki, İsa Qəmbər seçiləcəyi təqdirdə əvvəlki partiya rəhbərliyinin səhvlərini təkrarlamayacaq və topladığı təcrübə ona imkan verəcək ki, ümummilli məsələlərdə dövlətin, dövlətçiliyin yanında olsun. Onun təcrübəsi həm də ona imkan verəcək ki, o radikal yox, mahiyyəti etibarilə konstruktiv, Azərbaycanın dövlət maraqlarına sadiqliyi ilə seçilən müxalifət kimi formalaşaraq siyasi fəaliyyət göstərsin. Biz bunu arzulayır və güman edirik. Əks halda öz əvvəlki tərəfli mövqeyində gedərsə, təəssüflə qeyd edirəm ki, Müsavat Partiyası Azərbaycanda seçilməyəcək. Böyük tarixi keçmişi olan Müsavat Partiyası öz tarixi adına layiq yer tutmayacaq”.