QAFSAM Şuranın dəstəyi ilə Türkiyədə Qarabağa dair təlimlər keçdi – FOTOLAR
Qafqaz Beynəlxalq Münasibətlər və Strateji Araşdırmalar Mərkəzi (QAFSAM) Azərbaycan Respublikasının Prezidenti Yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə “Ermənistanın işğalçılıq siyasətinin yaratdığı problemlər haqqında əcnəbilər üçün təlimlərin keçirilməsi, xarici mediada müxtəlif elmi məqalələrin nəşri” adlı layihə həyata keçirir. Bu çərçivədə Ermənistanın işğalçılıq siyasəti ilə bağlı Türkiyədə və Azərbaycanda əcnəbi tələbələr üçün təlimlər keçirilir.
2018-ci ilin oktyabrın əvvəlində Qafqaz Beynəlxalq Münasibətlər və Strateji Araşdırmalar Mərkəzinin (QAFSAM) sədri Araz Aslanlı və Azərbaycan Dövlət İqtisad Universitetinin müəllimi Nazim Cəfərov bu məqsədlə Türkiyədə səfərdə olmuşdur. Araz Aslanlı 3 oktyabr 2018-ci il tarixdə QAFSAM və Giresun Ülkü Ocaqları tərəfindən Giresun Bələdiyə salonunda əcnəbi tələbələr üçün birgə təşkil edilmiş təlim-seminarda məruzə etmişdir. 2018-ci il oktyabr ayının 4-də Nazim Cəfərov Kastamonu Universitetində QAFSAM və Kastamonu Universiteti Gənc Tarixçilər Klubu tərəfindən birgə təşkil edilən təlim-seminarda məruzə etmişdir. 2018-ci il oktyabr ayının 6-da isə Ankara şəhərində QAFSAM və Xəzər Dərnəyi tərəfindən birgə təşkil edilən təlim-seminarda həm Araz Aslanlı, həm də Nazim Cəfərov məruzə etmişdir. Təlim-seminarlarda Türkiyədə təhsil alan müxtəlif ölkələrin vətəndaşları iştirak etmişdir.
Təlim-seminarlarda Qarabağ probleminin tarixi təməllərinə və həlli prosesinə toxunulmuş, xüsusilə Ermənistanın Azərbaycan ərazilərini işğal etməsinin Azərbaycan və ümumilikdə regionumuz üçün yaratdığı ağır nəticələr təhlil edilmişdir.
Bunlarla yanaşı Nazim Cəfərov 3 oktyabr tarixində Kastamonu Universitetində, Araz Aslanlı isə 4 oktyabr tarixdə Gümüşhanə Universitetində təşkil edilən beynəlxalq simpoziumda məruzə etmişdir. Məruzələrdə Azərbaycanın 20-ci əsrin əvvəllərində və sonlarında qarşılaşdığı problemlərə və Ermənistanın işğalçılıq siyasətinə toxunulmuşdur.
Qeyd edək ki, QAFSAM bundan öncə Hacettepe Universitetində də xarici ölkə vətəndaşı tələbələr üçün Ermənistanın işğalçılıq siyasətinini nəticələri ilə bağlı təlim-seminar təşkil etmişdi.
