Fransızdilli “Le Carrefour” qəzetinin 11 yaşı oldu
Azərbaycanda fransız dilində nəşr olunan yeganə mətbu orqan “Le Carrefour” (“Yol qovşağı”) qəzetinin 11 yaşı tamam oldu. Qəzet 2007-ci il may ayının 14-də Azərbaycan Respublikası Ədliyyə Nazirliyində qeydiyyata alınıb.Bu mətbu orqanın yaradılmasında əsas məqsəd Azərbaycan-Fransa əlaqələrinin inkişafına töhfə vermək, Azərbaycan həqiqətlərini dünya ictimaiyyətinə çatdırmaq, ölkəmiz haqqında fransızdilli oxuculara məlumat verməkdir.Ölkəmizi tanıtmaq, xalqımızın milli və mənəvi dəyərlərinin, həmçinin mədəni irsinin təbliği də bu missiyanın tərkib hissəsidir.
Qəzet özünün ilk sayından Ermənistan-Azərbaycan Dağlıq Qarabağ münaqişəsi ilə bağlı həqiqətləri fransız dilində oxuculara çatdırır.
“Le Carrefour” qəzeti Azərbaycan və Fransa, eyni zamanda fransızdilli ölkələr arasında mədəni, iqtisadi, elmi əlaqələri inkişaf etdirmək, fransızları və ümumilikdə, əcnəbiləri ölkəmizdə baş verən sosial-ictimai, mədəni, iqtisadi hadisələr barədə məlumatlandırmaq, onlara öz dillərində informasiya verməklə Azərbaycanı Fransada və fransızdilli ölkələrdə tanıtmaq missiyasını öz üzərinə götürüb.
2009-cu ildə qəzetin saytı www.lecarrefour.az fəaliyyətə başlayıb, 2016-cı ildə sayt yenilənərək xəbər portalı kimi fransızdilli ölkələrdən olan oxuculara Azərbaycan haqqında gündəlik məlumatlar verir.
“Le Carrefour” qəzeti sosial şəbəkələrdə də aktiv şəkildə təmsil olunur. Qəzetin Twitter, Linkedin, Facebook, Instagram səhifələri var. “Le Carrefour” qəzeti Azərbaycan Mətbuat Şurasının üzvüdür.
Qəzetin və saytın əsas ideyası və fəaliyyəti Azərbaycan Respublikasının Prezidenti İlham Əliyevin öz çıxışlarında dəfələrlə səsləndirilən xarici media resursları, o cümlədən Fransa ilə media sahəsində daha sıx əlaqələrin yaradılması və Dağlıq Qarabağ münaqişəsinin dünya ictimaiyyətinə çatdırılması üçün xarici media məkanına daha çox çıxış imkanının əldə olunması istiqamətinə yönəlib. İllərdir ki, qəzet fəaliyyətini məhz bu istiqamətdə qurur.
Hazırda qəzetin 110 ölkənin mediasını birləşdirən və baş ofisi Parisdə yerləşən Beynəlxalq Fransızdilli Mətbuat Birliyi (UPF) və Fransanın TV5 kanalı ilə (TV5Monde), o cümlədən Beynəlxalq Frankofoniya Təşkilatı (OİF), Frankofoniya Universitetləri Agentliyinin (AUF) Mərkəzi və Şərqi Avropa üzrə ofisi və digər fransızdilli beynəlxalq təşkilatlar ilə əlaqələri var.
“Le Carrefour” qəzetinin təşəbbüsü və təşkilatçılığı ilə Azərbaycan Mətbuat Şurası ilə birgə 2008 və 2012-ci illərdə “Azərbaycanda xaricidilli KİV-in durumu: problemlər və inkişaf perspektivləri” mövzusunda bir neçə dəfə silsilə dəyirmi masalar təşkil edilib. Eyni zamanda, 2016-cı ilin yanvar ayında qəzetin təşəbbüsü ilə Jurnalist Qadınlar Assosiasiyası ilə birgə Azərbaycanın ilk şəhid qadın jurnalisti, Azərbaycanın Milli Qəhrəmanı Salatın Əsgərovanın anım günü ilə əlaqədar tədbir təşkil olunub.
2016-cı ilin aprel ayının 19-da Azərbaycan Dillər Universitetində (ADU) sözügedən ali təhsil müəssisəsinin İctimaiyyətlə əlaqələr departamenti ilə birgə “Le Carrefour” qəzetinin təşəbbüsü və təşkilatçılığı ilə “Azərbaycanın xaricidilli KİV-i beynəlxalq müstəvidə” mövzusunda konfrans keçirilib.
2017-ci ilin aprel ayının 5-də “Le Carrefour” qəzetinin Fransanın Azərbaycandakı səfirliyinin Frankofoniya həftələri çərçivəsində keçirdiyi tədbirlər çərçivəsində Azərbaycanda Fransız İnstitutunda qəzetin təqdimatı da keçirilib.
Qəzetin təsisçisi və baş redaktoru fransızdilli jurnalist, Beynəlxalq Fransızdilli Mətbuat Birliyinin Azərbaycan bölməsinin rəhbəri Zeynab Kazımovadır.
Həmkarlarımızı təbrik edir, bu şərəfli fəaliyyətlərində uğurlar arzulayırıq!
