Deputat rektoru tənqid etdi: “BDU tənəzzül dövrünü yaşayır…”

“Bu gün təhsilimizin qarşısında çox mühüm vəzifələr durur və bu vəzifələrin icrası üçün hamımız çox ciddi məsuliyyət daşıyırıq. Belə olan halda, Bakı Dövlət Universitetinin də üzərinə böyük məsuliyyət düşür. BDU Azərbaycanın ilk ən qədim universitetlərindən biridir. Azərbaycan Xalq Cümhuriyyəti dövründə yaradılıb. Mən də izləyirəm, BDU-nun rektorunun “reytinqlərdə geri qalmağımızın səbəbi tək bizim inkişafımızın zəifliyi ilə yox, digərlərinin çox sürətli inkişafı ilə bağlıdır” açıqlaması cəmiyyət tərəfindən birmənalı qarşılanmayıb. Hesab edirəm ki, bu cür açıqlamalarda hər kəs diqqətli olmalıdır. Reytinqlərdən geri qalmağımızın digər universitetlərin sürətli inkişafı ilə əlaqələndirilməsi düzgün yanaşma deyil. Qocaman bir universitetin rektoru belə fikir bildirməməli, bu kimi ifadələri səsləndirərkən daha diqqətli olmalı idi. Çünki cəmiyyətimizin BDU-dan gözləntiləri böyükdür”.

Bu sözləri Pravda.az-a açıqlamasında Milli Məclisin Elm və təhsil komitəsinin üzvü Ceyhun Məmmədov deyib.

Deputat təəssüflə qeyd edib ki, bu gün Bakı Dövlət Universiteti özünün tənəzzül dövrünü yaşayır: 

“BDU Azərbaycan cəmiyyətinin ümidlərini, azularını tam doğrultmur. Bu universitetin inkişafında, təhsilinin keyfiyyətində və məzmununda ciddi dəyişikliklər görmürük. Düşünürəm ki, ictimaiyyətin narazılığının səbəblərindən biri də budur. Universitetlərimiz daha çox çalışmalı, səy göstərməlidirlər. Rektorlarımızın baxışı, yanaşması daha sağlam, düzgün olmalıdır. Məsələyə bu cür baxışla, belə yanaşma ilə universitetlərimizi inkişaf etdirə bilmərik. Qarşımıza daha böyük hədəflər, məqsədlər qoymalıyıq. Bunu bütün universitetlər barəsində demirəm, amma təhsilimizin, bəzi universitetlərimizin bu səviyyədə olmasının elə əsas günahkarlarından biri də həmin universitetlərin rektorlarının təhsilimizə yanaşması, baxışıdır. Çox səy göstərməli, çalışmalıyıq ki, təhsilimizin keyfiyyətini, məzmununu, mahiyyətini dəyişək, qarşıya qoyduğumuz hədəf və məqsədlərimizə nail olaq”.