Başqa ali təhsil müəssisələri məzunlarının 347-si AzMİU-nu seçib

Başqa ali təhsil müəssisələri məzunlarının 347-si AzMİU-nu seçib

Azərbaycan Memarlıq və İnşaat Universitetinin (AzMİU) magistratura səviyyəsinə 2022-2023-cü tədris ili üzrə 552 tələbə qəbul olub. Bunlardan 347 nəfəri, başqa sözlə 60%-i bakalavr təhsilini başqa ali təhsil müəssisələrində alıb”.

Bu sözləri AzMİU-nun Magistratura Mərkəzinin direktoru, dosent Rövşən Səmədov universitetin Elmi Şurasında “2022/2023-cü tədris ilində tələbə qəbulunun nəticələri, universitetin hədəfləri və gələcəyə baxış” adlı hesabat çıxışında deyib.

Mərkəz direktoru bildirib ki, başqa ali təhsil müəssisələri məzunları arasında AzMİU-nu seçənlərin sayındakı artım tempi son 4 ildir ki, davam edir.

“Artım tempi 2019-2020-ci tədris ilindən etibarən davam edir. Belə ki, AzMİU-ya magistratura səviyyəsi üzrə qəbul olan tələbələrin 2019-2020-ci tədris ilində 56%, 2020-2021-ci tədris ilində 57%, 2021-2022-ci tədris ilində 69%, cari tədris ilində isə 60%-i başqa universitetlərin məzunları olub. Apardığımız analizlər göstərir ki, son illər universitetdə həyata keçirilən elmi-texniki yeniliklər, tədris laboratoriyalarının gücləndirilməsi, şəfaf imtahan prosesinin təşkili və yaradılan bu kimi digər imkanlar ümumilikdə qəbulun səviyyəsinin, o cümlədən başqa ali təhsil müəssisələri məzunların arasında AzMİU-nu seçənlərin sayının yüksəlməsinə səbəb olub”.  

Rövşən Səmədov əlavə edib, 2022/2023-cü tədris ilində AzMİU-nun magistratura səviyyəsinə tələbə qəbulu üzrə plan yeri 92% yerinə yetirilib.