“Vəfa” Sosial Problemlərin Həllinə Dəstək İB-i 25 nömrəli tam orta məktəbdə maarifləndiormə tədbiri keçirib
“Vəfa” Sosial Problemlərin Həllinə Dəstək İB-i 25 nömrəli tam orta məktəbdə maarifləndiormə tədbiri keçirib
“Vəfa” Sosial Problemlərin Həllinə Dəstək İB-i Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Gənc və yeniyetmələrin antinarkomaniya ruhunda tərbiyə olunmasının aşılanması” layihəsi çərçivəsində 25 nömrəli tam orta məktəbdə maarifləndirmə tədbiri keçirib. Baş tutan tədbirdə “Vəfa” Sosial Problemlərin Həllinə Dəstək İB-in sədri Fatma Hacıyeva, “Gənclərin Töhfəsi” İB-nin sədri və Gİ Nazirliyi yanında İctimai Şuranın üzvü Asim Vəliyev, Azərbaycan Autizm Assosiasiyasının rəhbəri və Gİ Nazirliyi yanında İctimai Şuranın üzvü Elnur Məmmədli, “Azad Həmfikirlər” Gənclərin Maarifləndirilməsi İctimai Birliyinin sədri Samirə Mustafayeva, məktəbin valideyn Komitəsinin sədri Elnarə Məmmədova, YAP-ın nümayəndəsi Ülvi Abbasov, məktəbin psixoloqu İradə Rzayeva, məktəbin kitabxana müdiri Raifə Niftəliyeva və məktəblilər iştirak edib.
Layihə rəhbəri, eyni zamanda “Vəfa” Sosial Problemlərin Həllinə Dəstək İB-nin sədri Fatma Hacıyeva çıxışında layihənin məqsədinin XX əsrin bəlalarından sayılan və XXI əsrin də ən ağır problemləri sırasında qalmaqda olan narkomaniya, narkomanlığın gələcəyimiz olan gənclər arasında yayılmasının, narkotik vasitələrin dövriyyəsinə qarşı mübarizə aparmaq, gələcək üçün sağlam gənclik, sağlam vətəndaşın yetişdirilməsinə köməklik göstərmək olduğunu vurğulayıb. Müasir gəncliyin sağlam gələcəyinin təmin olunması istiqamətində məktəb şagirdləri ilə maarifləndirici söhbətlər edib.
Daha sonra “Gənclərin Töhfəsi” İB-nin sədri və Gİ Nazirliyi yanında İctimai Şuranın üzvü Asim Vəliyev çıxışında şagirdləri narkotik vasitələrdən uzaq durmaları ilə bağlı tövsiyələr verib. Narkomaniyanın birbaşa onların gələcək həyatlarına necə mənfi təsir edəcəyini, narkotik vasitələrdən istifadə etməklə öz sağlamlıqlarını təhlükə altına salacaqlarını bildirib. Tədbir gedişatında dəvət olunmuş qonaqlar çıxış edərək sağlam həyat tərzinin təbliğ olunması, narkomanlığın fəsadları haqqında gənclərdə düzgün təsəvvürün formalaşması üçün maarifləndirici tədbirlərin mütəmadi olaraq keçirilməsini, eyni zamanda ictimaiyyətin diqqətinin narkomanlıqla bağlı problemin həllinə cəlb olunmasının vacibliyini vurğulayıblar.
Tədbirin sonunda şagirdlərə məlumatlandırma bukleti və maarifləndirici kitabçalar paylanılıb.
