“İblislə belə eyni masada əyləşməyə razıdırlar” – YAP-dan Əli İnsanovun Əli Kərimli ilə görüşünə münasibət
“Ötən gün radikal qüvvələr olan Əli Kərimli ilə Əli İnsanovun görüşü baş tutub. Bu görüş bir daha sübut edir ki, onlar öz funksiyalarının qarayaxma və böhtan kampaniyaları yolu ilə icrasına davam edirlər. Vaxtilə bir-birləri ilə əks cəbhələrdə dayanan, barələrində müxtəlif tənqidi fikirlər və təhqirlər səsləndirən iki insanın görüşməsi bir daha göstərir ki, bu cür insanlar öz məqsədlərinə çatmaq üçün, hətta iblislə belə eyni masada əyləşməyə razıdırlar”.
Bunu Pravda.az-a açıqlamasında Yeni Azərbaycan Partiyasının İdarə Heyətinin üzvü, Milli Məclisin deputatı Cavid Osmanov Azərbaycan Xalq Cəbhəsi Partiyasının sədri Əli Kərimli ilə Haqq və Ədalət Partiyasının sədri Əli İnsanov arasında noyabrın 25-də baş tutan görüş barədə danışarkən deyib.
YAP funksioneri bildirib ki, partiya sədrlərinin çoxdan getmiş qatara indi bilet almaq cəhdləri heç bir nəticə verməyəcək: “Əlbəttə ki, Əli Kərimli ilə Əli İnsanov arasında elə əvvəlcədən əlaqə olub. Ötən gün baş tutan görüş həmin adamların tək qalmasından xəbər verir. Lakin görüşərək birgə fəaliyyətə başlamağı planlaşdırsalar da, onların tək və ya cüt olmasının heç bir fərqi yoxdur. Əli Kərimli və Əli İnsanov növbəti dəfə əsl simalarını ortaya qoydular”.
