Deputat həmkarına irad bildirdi

“Mən təəssüf edirəm ki, həmkarım Kamal Cəfərov dövlət qulluqçusuyla Milli Məclisin deputatlarının funksiyalarını ayırd edə bilmir”.

Bunu deputat Qüdrət Həsənquliyev Milli Məclisin bu gün keçirilən iclasında “Dövlət qulluğu haqqında” qanunun müzakirəsində çıxış edərkən deyib.

O qeyd edib ki, Milli Məclis seçkili orqandır və deputatlar da parlamentə seçki yoluyla seçilir:

“Ancaq dövlət qulluğuna qəbul seçki yoluyla baş tutmur. Ötən iclasda mən dövlət qulluğuna qəbulun sadəcə müsahibə ilə keçirilməsini təklif etdim. Qanun layihəsini təqdim edən deputat həmkarım Kamal Cəfərov də inkişaf etmiş ölkələrin çoxunda dövlət qulluğuna qəbulun təkcə müsahibə yolu ilə olduğunu qeyd etdi. Yəni dolayısıyla mənim dediklərimi təsdiqlədi.

Digər tərəfdən hər 5 ildən bir dövlət qulluqçularının imtahan verərək sertifikat alması ilə bağlı məsələyə toxundum. Yəni insanlar işlədikləri dövrdə təcrübə qazanırılar. Bununla bağlı yeni seçilən deputatlara da üzümü tutdum. Dedim ki, ilk seçilənlə indiki arasında onların təcrübəsi xeyli artıb. Kamal müəllim isə mənim sözümü tuturmuş kimi dərhal dedi ki, onsuz da deputatlar da 5 il müddətinə seçilir.

Təəssüf edirəm ki, Kamal bəy, deputatla dövlət qulluqçusunun funksiyalarını bilmir. Millət vəkili qanunlar qəbul edir. Yəni doğrudan da millət vəkili ilə dövlət qulluqçusunu bu şəkildə müqayisə etmək nə dərəcədə doğrudur bilmirəm. Amma qanunu təqdim edən şəxslərin bir məsələ ilə bağlı tam əminliyi yoxdursa,  belə hallarda çalışsınlar ki, danışmasınlar, ya da gözləsinlər növbəti oxunuşda cavab versinlər”.