Hakimiyyət əyləşdiyi budağı mişarlayır… – Elxan Şükürlü yazır
Bütün irad və təkliflərə, eləcə də milli birliyin zəruriliyi haqda çağırışlara baxmayaraq, Prezident İlham Əliyevin AXC-Müsavat hakimiyyətini sərt tənqiddən əl çəkməməsi, onları Şuşa və Laçını satmaqda ittihama davam etməsi artıq göstərir ki, bu, emosional ovqatdan daha çox, bundan sonra yürüdüləcək rəsmi siyasətdən və Rusiya-Qərb münasibətlərinə hesablanmış ritorikadan qaynaqlanır.Xatırladaq ki, AXC-Müsavat hakimiyyəti (Elçibəy komandası) Rusiyanın Azərbaycandakı əsas şəbəkəsinin başında duran Ayaz Mütəllibov iqtidarını devirən və Azərbaycanın gələcəyini də Qərbdə, NATO-da görən, bu səbəbdən də bölgədə Qərbin maraqlarına “yaşıl işıq” yandıran antirus komanda idi…
44 günlük Qarabağ savaşı isə artıq bölgədə yeni geopolitik situasiya yaradıb: Elçibəy iqtidarının Azərbaycandan çıxardığı rus hərbçiləri 27 il sonra “sülhməramlı” adıyla yenidən Azərbaycan ərazisinə qayıdıblar və 10 noyabr sazişinə görə, azı, 5 il hələ buradadırlar.
İndi Prezident Əliyev 28 il əvvəlki Elçibəy komandasını Azərbaycanın bütün bəlalarının baiskarı kimi göstərməklə, bir tərəfdən, Rusiyanın sıxışdırılıb bölgədən çıxarılmasının yanlışlığına və bunun da təqsirinin o dövrkü hakimiyyətdə olduğuna eyham vururusa, deməli, Azərbaycan hakimiyyəti Qərbdən əlini tamamilə üzüb və bizi qarşıda Qərblə “soyuq savaş”, Rusiya ilə daha “isti təmaslar” gözləyir…
Mümkündür ki, Ermənistanla nəqliyyat-kommunikasiya xətlərinin açılmasından sonra Azərbaycanın Avrasiya İqtisadi Birliyinə (AİB) qoşulması məsələsi də gündəliyə gətirilsin…
Şübhəsiz, bu durum Qarabağ üzərində qurulmuş yeni antiqərb ittifaqını – Rusiya, Türkiyə və Azərbaycan hakimiyyətlərini hədəf seçən, onları yıxmağa çalışan Bayden administrasiyasının da alternativ təzyiqləriylə üzləşmək deməkdir.
Rusiyada Putinə, Türkiyədə Ərdoğana basqılar göz önündədir və Azərbaycandakı hadisələr də bu iki ölkədəki durumdan asılı olaraq inkişaf edəcək.
Belə getsə, böyük ehtimalla, Azərbaycanda yenidən 1992-93-cü illərdəkinə oxşar durum yaranacaq: onda Ayaz Mütəllibova qarşı düşmənçilik hissi Heydər Əliyevlə Elçibəyi öz qüvvələrini yaxınlaşdırmağa, müttəfiq olmağa sövq etdiyi kimi, indi də İlham Əliyevə qarşı düşmənçilik vurulmuş “köhnə qvardiya”nı müxtəlif mesajlarla öz ətrafına toparlamağa çalışan və Qərblə yaxınlaşmanı da əsas istiqamət elan edən Əli İnsanovu sabiq “Elçibəy komandası” – AXCP və Müsavatla yaxınlaşmağa sövq edəcək…
Əgər tezliklə həbsdən çıxmağa nail olarsa, həm Qərb, həm də Rusiya ilə sıx təmasları olan sabiq baş prokuror, səfir Eldar Həsənov da gələcəkdə hakimiyyətdən vurulmuşların və müxalifətdəkilərin dəstəyini öz ətrafında cəmləyə biləcək ən ciddi fiqurlardan biri ola bilər…
Oyun yenidən başlayır – bu dəfə daha ciddi…
Hakimiyyət isə gərəkli islahatlarda gecikməklə və milli birliyə ardıcıl zərbələrlə oturduğu budağı mişarlamaqla məşğuldur…
Elxan Şükürlü
