İqtisadiyyatManşetXəbər xətti

“İnsanlar kifayət qədər iş yerlərini itiriblər” — Deputatdan hökumətə ÇAĞIRIŞ

“Dövlət büdcəsi yalnız Maliyyə Nazirliyinin büdcəsi deyil. Elə suallar var ki, biz onu digər qurumların rəhbərlərindən də bunu soruşmaq istərdik. Xüsusilə, bank sistemi ilə bağlı suallarım var idi”.Demokrat.az xəbər verir ki, bunu parlamentin bu gün keçirilən komitə iclasında deputat Vahid Əhmədov deyib.

Onun sözlərinə görə, bank sisteminin monitar siyasətin qorunması istiqamətində əhəmiyyəti var:

“Dövlət büdcəsinin icrasına daha dəqiq yanaşmalıyıq. Bir sıra hökumət üzvlərini çağırmalıyıq ki, suallarımıza cavab versin. Hazırda Mərkəzi Bankın rəhbərliyi burada yoxdur. Düzdür, 2019-cu ildə uçot dərəcəsində enmələr baş verdi. Ancaq 2019- cu ildə bank sistemində ciddi irəliləyişə nail ola bilmədik. Problemlər hələ də qalmaqdadır. Yüksək faiz dərəcələri, istehlak kreditlərinin qalıb. Bu da real sektorunun inkişafına təsir edib. Mərkəzi Bank 2020-ci ildə həm uçot dərəcəsi, həm də real sektorun inkişafına diqqətdə saxlamalıdır. Bu yaxınlarda 4 bank bağlandı. Bunların hamısının birlikdə əmanəti 700 milyon manatdan artıqdır. Burada söhbət ancaq əmanətlərdən gedir. Doğrudan da, həmin banklarda vəsait varmı bu qədər əmanəti qaytarmağa? Yoxsa yenə dövlət büdcəsinə müraciət edəcəklərmi? Mən açığı bankların bağlanmasının tərəfdarı olmamışam. Bunların birləşdirilməsi prosesi olmalıydı. İnsanlar kifayət qədər iş yerlərini itiriblər”.

V. Əhmədov həmçinin, insanların içməli su, o cümlədən, suvarma sistemləri ilə bağlı problemlərinin həlli üçün Maliyyə nazirinin ölkə başçısına məruzə etməsini istəyib.

Deputat ölkədə ixracın yox səviyyəsində olduğunu vurğulayıb:

“Sadəcə, neft və bir-iki kənd təsərrüfatı məhsulu ixrac edirik. Qalan heç bir sahədə, xüsusilə də, sənayedə ixrac yoxdur. Bu gün ixrac üçün Azərbaycanda iri sənaye müəssisələrinin yaradılmasına ehtiyac var”.