Məhbus həyatından sonra onların taleyi necə olur? – Onlara iş verin

Ölkənin mərkəzi və yerli TV kanallarının demək olar ki, hamısında cinayət və cəza mövzusunda kriminal proqramlar var. Bu proqramlara baxdıqca isə adamı dəhşət bürüyür və bir sıra suallar yaranır.

Cəmiyyətdə ehtiyatsızlıqdan və qəsdən törədilmiş cinayətlərə görə həbsə düşənlər, həmçinin insanların məhbus həyatını gördükdən sonra belə yenidən təkrar cinayət törədərək dustaq həyatını seçmələri, dörd divar arasından azadlığa çıxaraq cəmiyyətdə özlərinə yer tapa bilməmələri hər zaman gündəmdə cavabı tapılmayan məsələlərdən olub. Bunun yaşadığımız cəmiyyətlərin yazılmamış qanunları, subyektiv səbəbləri oluğu kimi, obyektiv səbəbləri də var. Lakin, bir məsələ daim bu mövzunu diqqətdə saxlamağa və həssas yanaşmağa, həmçinin onlara olan münasibətdən dolayı üzərimizə də az məsuliyyət qoymur.

Hər il cəzaçəkmə müəssisələrindən və həbsxanalardan müxtəlif səbəblərdən azadlıqdan məhkum edilmiş minlərlə şəxs azadlığa buraxılır. Bunların arasında cəzasını çəkərək azad edilənlər, amnistiya və əfvetmə ilə bağlı məhkum həyatına son qoyan məhbuslar var.

Maraqlı olanı isə odur ki, görəsən ölkədə neçə şirkət və dövlət qurumu cəzaçəkmə müəssisələrindən azadlığa buraxılan keçmiş məhbusa iş verib, onların normal həyata qayıtması üçün şərait yaradıb? Bunun rəsmi statistikası bəlkə də var. Amma görəsən ölkədə iş yerlərinin əksər hissəsini təşkil edən özəl sektorda, xüsusən şirkətlərdə keçmiş məhbuslara, dustaq həyatı yaşamış insanların iş ilə təmin olunmasına nə dərəcədə dəstək olaraq şərait yaradılır?

Azərbaycan kinosu olan “Arxadan vurulan zərbə” filmində deyildiyi kimi “Oğru İmaşa iş verən kimdir. Onunla işləmək istəyən kimdir?”

Bax əsas məsələ də budur.

İlham Məmmədzadə