“Paradiqma” İctimai Birliyi DİA-da tədbir keçirib
Mayın 29-da Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi və “Paradiqma” İctimai-siyasi tədqiqatlar ictimai birliyinin təşkilatçılığı ilə Azərbaycan Respublikasının Prezidenti yanında Dövlət İdarəçilik Akademiyasının (DİA) konfrans zalında “Gənclərin internet səhifələrində, o cümlədən sosial şəbəkələrdə milli maraqların müdafiəsinə cəlb edilməsi” layihəsinin ilk tədbiri keçirilib.
İB-dən Aktor.Az-a verilən məlumata görə, tədbir çərçivəsində çıxış edən layihə rəhbərinin köməkçisi (moderator) Hacı Əliyev bildirib ki, layihəni həyata keçirməkdə məqsəd gənclərin internet səhifələrində, o cümlədən sosial şəbəkələrdə milli maraqların müdafiəsinə cəlb edilməsi işini innovativ yanaşmalarla təmin etməkdən, tədqiqat predmeti ilə bağlı elmi-nəzəri mühakimələr, ideyalar, praktiki tövsiyələr irəli sürməkdən, habelə müvafiq təbliğat, təşviqat və maarifləndirmə işləri həyata keçirməkdən ibarətdir.
Tədbirdə çıxış edən siyasi elmlər üzrə fəlsəfə doktoru Elnur Əliyev qeyd edib ki, XXI əsr informasiya əsridir və bu reallıqdan çıxış edərək informasiya siyasəti hücum taktikasına söykənməlidir: “Xüsusilə sosial şəbəkələrin yaratdıqları imkanlardan bu istiqamətdə maksimum faydalanmaq vacibdir. Bu baxımdan gənclərin üzərinə böyük məsuliyyət düşür”.
Müzakirələrdə iştirak edən tələbələr Günel Quliyeva, Adil Babayev, Nigar Xəlilzadə, Kamran Rzazadə, Səyyad Yusifli və başqaları layihə çərçivəsində nəzərdə tutulan vəzifələrin icrasında yaxından iştirakın vacibliyini vurğulayıblar və bu istiqamətdə konkret təklif və tövsiyələr irəli sürüblər.
Təqdimat mərasimində Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının əməkdaşı, QHT təmsilçiləri, müxtəlif ali məktəblərin bakalavr, magistr və doktorantları iştirak edib.
