Biləsuvarda Gömrük Komitəsinə qarşı etiraz aksiyası – VİDEO

Ötən gün bir qrup şəxs Gömrük Komitəsinin Cənub Ərazi Baş Gömrük İdarəsinin binası qarşısında etiraz aksiyası keçirib.Aksiya iştirakçıları Biləsuvar rayonunun sakinləri olub. 

Onlar bildiriblər ki, yaşayışları üçün hər dəfə İrandan gətirdikləri ərzağa görə onlardan rüşvət tələb olunur və süründürməçiliyə salırlar.

Aksiya iştirakçıarı əsasən Qarabağ müharibəsinin veteranları olub.

Aksiyaçılar bildirib: “Prezident xalqla görüşür, problemlə  maraqlanır, amma burada bizim üçün əlavə problem yaradırlar. Mən 50 ildir Biləsuvarda yaşayıram evim yoxdur, amma Cəmil adlı şəxs yük şöbəsinin müdiri təyin olunduqdan sonra iki mərtəbəli ev aldı. Bu necə olur, bəlkə yoxlasınlar…”.

Məsələ ilə bağlı Gömrük Komitəsinin mətbuat xidməti də açıqlama yayıb.

Bildirilib ki, aksiya keçirən şəxslər konkret fakt və ya dəlil olmadan gömrük orqanlarını və onun əməkdaşlarını qanunlara əməl etməməkdə günahlandırır. Dövlət Gömrük Komitəsi bildirir ki, etiraz edən şəxslər mütəşəkkil şəkildə İran İslam Respublikasından müxtəlif adda məhsullar alaraq Nazirlər Kabinetinin 305 saylı qərarı ilə müəyyən edilən məhdudiyyətlərdən yan keçmək məqsədilə qarşı tərəfdə əvvəlcədən razılığa gəldikləri şəxslərə paylayır, ölkənin gömrük sərhədindən keçirdikdən sonra malları həmin şəxslərdən toplayaraq satışını həyata keçirir.

“Gömrük orqanlarının apardığı müşahidə və araşdırmalar nəticəsində bu şəbəkələr və İran İslam Respublikasından gətirilən malları müəyyən məbləğdə pul vəsaiti qarşılığında daşıyan və gömrük sərhədindən keçirən şəxslər müəyyənləşdirilib və qanunvericiliyin tələblərinə uyğun şəkildə müvəqqəti saxlanca götürülüb. Lakin gömrük orqanlarının bu tələbi ilə razılaşmayan şəbəkə üzvləri qanunsuz şəkildə etiraz edərək gömrükçülərin iş rejiminə mane olur, gömrük xidmətinin fəaliyyətinə kölgə salan əsassız iddialar irəli sürürlər”.(Yeni Sabah)