Deputat seçicilərlə görüşüb
Azərbaycan Respublikasının Milli Məclisinin deputatı, Azərbaycan Mətbuat Şurasının sədri Əflatun Amaşov Saatlıda seçicilərlə görüş keçirib. 50-dən artıq seçicinin iştirak etdiyi görüşdə Ə.Amaşov 2018-ci ildəki fəaliyyəti ilə bağlı məlumat verib. O bildirib ki, ötən il ona deputat kimi 170 müraciət daxil olub. Bunlardan 102-i ərizə, 46-ı şikayət, 1-i təklif, 8-i nəzarət, 7-i təkrar, 6-ı kollektiv müraciətdir.
Müraciətlər əsasən sosial problemlərin həllinə, ünvanlı sosial yardım təyinatına, Azərbaycan Respublikasının Əmək və Əhalinin Sosial Müdaifəsi Nazirliyinin Məşğulluq Xidməti tərəfindən mal-qara əldə edilməsinə, əlillik təyinatına, müalicə üçün, mənzil təmirinə, mənzillə, maliyyə yardımı ilə təmin olunmağa kömək göstərilməsi ilə bağlıdır.
Hesabat müddətində daxil olmuş 170 müraciətdən 79-u ilə əlaqədar müvafiq izahat işi verilib. 23 müraciət qismən təmin edilib. Həll olunmuş məsələlərin sayı 27-dir. 20 müraciət icra mərhələsində olub. Müraciətlərdən 9-u baxılmaq üçün aidiyyatı təşkilatlara göndərilib. 7 müraciət baxılmamış saxlanılıb. Əsassız sayılmış müraciətlərin sayı 5-dir.
2018-ci ildə müxtəlif dövlət qurumlarına, idarə, müəssisə və təşkilatlara ümumilikdə 85 məktub ünvanlanıb. Bunlardan 66-ı deputat, 19-u deputat köməkçi tərəfindəndir.
2018-ci ildə deputat tərəfindən ümumilikdə 78 vətəndaş qəbul edilib. Qəbul edilmiş vətəndaşlardan 12-i mənzil (tikinti-təmir), 20-i səhiyyə (müalicə-müayinə-cərrahiyyə əməliyyatı), 21-i kənd təsərrüfatı (suvarma, toxumun yararsızlığı, gübrə təminatı, subsidiya, torpaq sənədlərində problemlər), 25-i sosial (işsizlik, ünvanlı sosial yardım-ÜSY, pensiya və müavinət təminatı, birdəfəlik maliyyə yardımı və s) məsələləri diqqətə çatdırıb. Vətəndaşlar məişət, sosial, səhiyyə, hüquq pozuntuları müstəvisindəki iddialarını şikayət formasında ifadə ediblər.
Qəbul edilmiş seçicilərdən 35-nə müvafiq tövsiyələr verilmiş, 23 halda problemin aradan qaldırılmasına dair yerli icra hakimiyyəti orqanlarının təmsilçiləri ilə əlaqə yaradılıb, qismən və ya tam həll variantı əldə edilib. 5 halda məsələ nəzarətə götürülərək digər qurumlarla rəsmi yazışma, yaxud şifahi danışıqlar yolu ilə həlli imkanlarına çalışılıb. 15 vətəndaşın üzləşdiyi çətinlik yerində həllini tapıb. Deputat köməkçisi tərəfindən qəbul edilmiş vətəndaşların sayı isə 36-dır.
2018-ci ildə deputat tərəfindən seçki dairəsində 6 görüş keçirilib. Deputatın Milli Məclisdəki çıxışlarının sayı 13-dür. Milli Məclisin xətti ilə xaricə 5 səfər edilib.
Ötən il deputat 11 müxtəlif şəxslə iş görüşü keçirib. 19 konfransda iştirak edib. Onun müxtəlif məsələlərlə bağlı açıqlamalarının sayı 16-dır.
Görüşdə seçicilərin sualları da cavablandırılıb. Həmçinin ayrı-ayrı vətəndaşlar fərdi şəkildə qəbul edilib. Onların problemləri qeydiyyata alınıb, müvafiq tövsiyələr və tapşırıqlar verilib.
