“Üzvlük məsələsi ada görə deyil…” – “Kobra” qalmaqalına daha bir reaksiya
“Azərbaycan Mətbuat Şurasına üzvlük fərdidir. Müraciət edən sayt, qəzet, jurnalın fəaliyyəti araşdırılaraq baxılması üçün İdarə Heyətinin müzakirəsinə təqdim olunur.”
Bu barədə açıqlamanı BakuPost-a Azərbaycan Mətbuat Şurası İdarə Heyətinin üzvü, “Azadınform” İnformasiya Agentliyinin Baş redaktoru Niyaz Niftiyev verib.
N.Niftiyev bildirib ki, hər hansı bir qəzetin və yaxud da saytın adı ilə bağlı tənqidi müzakirələr normaldır: “Biz bu saytın adının kobramedia.az olduğunu əsas göstərib Şuraya üzv qəbul etməyə bilməzdik. KİV orqanlarının üzvlük məsələsi onların adına görə deyil, fəaliyyətinə görə müəyyən edilir. Kobrameda.az-ın təsisçisi tanınmış jurnalist, uzun illər Azərbaycanın sanballı media orqanlarında çalışan, adı hansısa reket fəaliyyətində hallanmayan Valeh Mirzədir. V.Mirzə həm də şairdir. Saytın adı ilə bağlı biz də suallar verdik, hətta dəyişdirlməsi təklif olundu, onun da cavabına hörmətlə yanasdıq”.
N.Niftiyev bildirib ki, saytın adını müzakirəyə çıxarıb Mətbuat Şurası İdarə Heyəti üzvlərini tənqid edənlər haqlı deyillər: “Biz Valeh Mirzənin və saytının fəaliyyətində qeyri-qanuni heç nə görməmişik, saytla və baş redaktorla bağlı heç bir müraciət, şikayət yoxdur. Adı əsas gətirib Şura üzvlüyünə müraciətinə rədd cavabı verə bilməzdik”.
Baş redaktor sonda bildirib ki, həm Sovet dövründə, həm də müstəqillik illərindən bu sayaq adlar altında fəaliyyət göstərən kifayət qədər satirik-yumoristik KİV adlarına rast gəlmək mümkündür.
